Aa Chal Mere Saath

Aa chal mere saath, ek jagah dikhaani hai
Jo badi rumaani hai...
Motor car se nahi, paidal hi chalenge
Kyunki raahen bhi suhaani hai...
Naram makhmal ke chaadar si patli sadak hai, jispe nange paaon hi chalenge
Pairon ke nishaan jo chod jaani hai

Saari raah hum tere haath ko thaam ke chalenge
Tujh sang wafaa jo nibhaani hai

Dekhna raaste ke chaaro or hariyali ke baadal Picasso ki painting ke jaise chaae honge
Jisme kai rang birange panchiyon ki likhi jaa rahi kahaani hai
Dekhna chaaro or hum jaise do panchi kitne saare honge
Unki sargoshee ke sang tujhe aashiqui ki dhun jo sunaani hai

Yun kuch thi raaste ki baat, ab teri mulaakat manzil se karaani hai

Raahen jab khatm hongi, toh ret pe humaare pair utrenge
Hawaaen badi tez hongi, teri khuli zulfon se jo khelenge

Saamne samundra ka kinaara hoga
Paar karne ko jise naw ka sahaara hoga
Le jaunga naw me baitha ke tujhko wahaan
Badi mushkil se milte hain koi heer-ranjha jahaan

Paani ki lahron ke saath behte chalenge
Khaamoshi ke saath hi teri nazron se kai baaten karte rahenge

Jab naw koi kinaara pakdega
Usi samay dheemi dheemi baarish hogi
Baarish me bheegte bheegte tere aankhon ko dhake hue ek gufa ke andar tujhko le jaunga

Teri aankhen band ho... mere kadmo ke sang tum ho...
Jab pahunch jayen hum wahaan toh apne haathon ko dheere se tere aankhon se hataaun...
Dheere se tu apni aankhen khole...

Chaaro or andhera... tu mujhe dekh nahi paa rahi hogi...
Tabhi tere bagal se ek glow-worm tim-timaate hue aaye
Fir ek ek karke us andhere me saare glow-worm chamak jaye

Nazaara hoga aisa tere saamne lagega pura aasman kareeb aa gaya...
Jispe chaaro or rangile taare chaa gaye

Itne sundar maahawl me tu zaroor muskuraegi
Jisko dekh ke meri aankhen khushi se bhar jaengi
Phir apne aansun poch ke khud ko tere saamne le aunga
Apni baahon me tujhko bhar ke tujh sang kahin gayab ho jaunga...

Photo credits: Google Images

Zindagi 2012 (End Of The World)

Ye sidhi sadhi zindagi chal rahi hai tedhe medhe raaston se
Kabhi thandi ped ki chaaon se toh kabhi kadi dhup ki baahon se
Kise pata kab tak chalegi ye zindagi
Ek din toh rukna hi hoga ise
Socho agar maya-sabhyata ki aakhri bhawishyawaani sach ho jae
Aur zindagi isi thand me tham jae
Uthe gaganchumbi lahren samundaro se aur zindagi inhi lahron me sama jae
Gunj uthe chaaro or humaari chikhen
Fir dheere dheere ye saara jahaan shaant ho jae

Ojhal ho jae haule se in kaanpti aankhon se saara nazaara
Tab ehsaas ho kitna sundar tha ye jahaan humara
Chut jaega fir saari yaadon ka bhi saath
Sirf reh jaega humara ye tan prakriti ke saath
Kuch pal me hi ye aatma is jahaan me vilin ho jae
Aur hum sab kahin kho jaen

Tabhi achanak kaano ko sunai de "ishq sufiana" ki dhun
Aur room-mate bole "oye 8 baj gaye alarm sun"
Hadbada ke ye aankh khule aur man me khayal aaye
"Zindagi toh abhi baaki hai, kyun na thoda aur so liya jae"


Photo credits: Pixabay.com

Mere Joote Puchte Hain

Mere joote puchte hain, "Kitna aur chaloge?"

Mere joote puchte hain, "Kab tak is tapti dhup pe chaloge?"

Mere joote puchte hain, "Kab thandi aaraam-dayak raahen aengi?"

Mai kuch nahi kehta inse,

Bas apna muskuraata hua chehra dikha deta hun

Ye fir muhse puchte hain.... "Kab tak apne hoton pe jhuthi hansi le ke chaloge?"

Photo credits: Google Images

Tere Bina (Without You)

Kyun teri yaadein aati hain is tarah

Kyun meri aankhen bhar jaati hai bewajah

Gham hai ye kaisa, na dhalta ab ye samaa

Aahat bhi ab meri rehti hai bezubaan

Ab kaise mai jiyun is tarah...

Tere Bina...  Tere Bina...

Ae khuda agar tu hai kahin

Toh use bata de, "intezaar me uske mai hun yahin"

Khaali raahon me baitha hun manzil ke bina

Ab toh bas suna hai mera jahaan...

Tere Bina...  Tere Bina...

Na jaane kyun dil me ab bhi jagi ek aas hai

Fir milegi tu aur baat hogi wahi

Fir hoga wo jahaan... wo samaa...

Tab tak ek kasak hai zindagi...

Tere Bina...  Tere Bina...

Photo Credits: Google Images